Lerik Dövlət Rəsm Qalereyasında görkəmli rəssam Şahvələd Əliyevin rəsmlərindən ibarət sərgi nümayiş olunmuşdur
Lerik Dövlət Rəsm Qalereyasında görkəmli rəsam, Azərbaycan Rəssamlar İttifaqının üzvü, Karikaturaçı Rəssamlar İttifaqının üzvü, Azərbaycan Dövlət Mədəniyyət və İncəsənət Universitetinin Rəssamlıq fakültəsinin müəllimi Şahvələd Əliyevin əsərlərindən ibarət sərgi nümayiş olunmuşdur.
Sərgini giriş sözü ilə açan Lerik Dövlət Rəsm Qalereyasının direktoru Mükafat Yaqubov sənətkar haqqında məlumat vermiş, sərgiyə gələn qonaqları tamaşaçılara təqdim etmişdir. Xalq rəssamı, Dünya Rəssamlar Akademiyasının Akademiki, ADMİU-nun kafedra müdiri Xanlar Əhmədov görkəmli sənətkarın yaradıcılığı haqqında məlumat vermiş, onun əsərlərini yüksək qiymətləndirmişdir. Sonra Azərbaycanın Əməkdar rəssamı, ADMİU-nun müəllimi, dosent Həmzə Abdullayev çıxış etmişdir. H. Abdullayev Şahvələd Əliyevin bir yaradıcı insan kimi mənəvi keyfiyyətlərindən söhbət açmışdır. ADMİU-nun müəllimi, Rəssamlar İttifaqının üzvü, Dünya Rəssamlar Akademiyasının həqiqi üzvü Səmədağa Cəfərov da sənətkar haqqında danışmış, yaradıcılığının incəliyindən, sənətkarın yorulmadan çalışaraq fədakarlıq etdiyindən söhbət açmışdır. Sonda sənətkarın özünə söz verilmişdir. Şahvələd Əliyev sərginin təşkilinə köməyi olan hər kəsə dərin təşəkkürünü bildirmiş, yaradıcılığından və gələcək planlarından danışmışdır.
Sonra tamaşaçılar sərgi salonunda istedadlı rəssamın əl işləri ilə tanış olmuş, xatirə kitabına öz ürək sözlərini yazmışlar.
Fərdi sərgidə istedadlı sənətkarın, əsasən rəngkarlıq və karikatura janrında çəkilmiş əl işləri nümayış olunmuşdur. İstedadlı rəssamın rəngkarlıq əsərləri və karikaturaları tamaşaçılar tərəfindən yüksək qiymətləndirilmişdir.